Almaty oblysynda paraplan baǵanaǵa soǵylyp, eki adam aýrýhanaǵa tústi
TALDYQORǴAN. QazAqparat - Almaty oblysynda paraplanmen ushqandar jaryq baǵanasyna soǵylyp, eki adam aýrýhanaǵa tústi. Qazir 50 jastaǵy azamattyń jaǵdaıy óte aýyr, jansaqtaý bóliminde jatyr, dep habarlaıdy QazAqparat tilshisi.
Oqys oqıǵanyń barysy vıdeoǵa túsip qalǵan.
«9 mamyr kúni Shamalǵan aýylynyń joǵarǵy bóliginde oqys jaǵdaı boldy. Paraplanmen ushqan demalýshylar aıaq asty uıytqyp soqqan jelden qurylǵyǵa ıe bola almaı, jaryq baǵanasyna soǵyldy. Paraplanda bolǵan eki adamnyń biri qazir aýyr jaǵdaıda jatyr, ekinshisi jeńil jaraqat alǵan. Osyǵan oraı okrýg turǵyndary men qonaqtarynan óz ómirlerińiz ben densaýlyqtaryńyzǵa qaýip tóndirmeýdi suraımyz. Tabıǵat aıasynda seıildeýge shyǵarda aýa raıy boljamyna nazar aýdaryńyzdar» dep jazylǵan áleýmettik jelidegi jazbada.
Almaty oblystyq densaýlyq saqtaý basqarmasynyń baspasóz qyzmeti 1971 jylǵy azamattyń jaǵdaıy aýyr ekenin jetkizdi.
«9 mamyr kúni Qarasaı aýdandyq aýrýhanasyna paraplannan qulaǵan eki adam tústi. 1971 jyly týǵan naýqastyń jaǵdaıy aýyr. Jansaqtaý bólimine jatqyzyldy. Birneshe súıegi synǵan. Basynan soqqy alǵan. Al 2004 jylǵy naýqas travmatologııa bóliminde em qabyldap jatyr. Mıy shaıqalǵan. Jaǵdaıy ortasha. Omyrtqasy synǵan» delingen vedomstvonyń habarlamasynda.
