Almaty oblysynda pandemııanyń ekinshi tolqynyna 7,3 mıllıard teńge bólingen
TALDYQORǴAN. QazAqparat - Almaty oblysy ákiminiń orynbasary Batyrjan Baıjumanovtyń aıtýynsha, pandemııanyń bolýy múmkin ekinshi tolqynyna daıyndyq jumystaryna oblystyq bıýdjetten qosymsha 7,3 mıllıard teńge bólingen, dep habarlaıdy QazAqparat tilshisi óńir basshysynyń baspasóz qyzmetine silteme jasap.
Bul qarajat birinshi kezekte aýrýhanalardy materıaldyq-tehnıkalyq jabdyqtaýǵa baǵyttalatyn bolady. Atap aıtqanda, 10 ottegi stantsııasyn, 150 ókpeniń jasandy jeldetý qurylǵysyn, 100 ottegi kontsentratoryn, 3 kompıýterlik tomografty jáne 3 sandyq rentgen júıelerin jáne basqa da qajetti medıtsınalyq qural-jabdyqtar satyp alynady. Onyń 500 mıllıony oblystaǵy medıtsınalyq mekemelerge qajetti dári-dármek satyp alý úshin qarastyrylǵan.
Osylaısha, aǵymdaǵy jyly Almaty oblystyq densaýlyq saqtaý salasyna qajetti qural-jabdyqtarmen qamtamasyz etý deńgeıi 89% jetedi. Arnaıy kólikter parki 75% jańaratyn bolady.
Aıta ketý kerek, búginde oblystyq densaýlyq saqtaý salasynyń balansyna taǵy 50 ottegi kontsentratory qosyldy. Olardy sheteldik kompanııa otandyq «QazMunaıGaz» kompanııasymen birlesip aýystyrǵan. Alynǵan ottegi kontsentratorlary aımaqtaǵy medıtsınalyq mekemelerge taratylady.
