Almaty oblysynda ózenniń muz oıylyp, eki kishkene bala sýǵa ketti

«2020 jyldyń 5 jeltoqsanynda saǵat 13:32-de Almaty oblysynyń Іle aýdany Túımebaev aýylynda qaraýsyz qalyp, abaısyzda Kishi Almaty ózeninde juqa muzdyń astyna túsip, 2014 jáne 2016 jyly týǵan eki balanyń qaıtys bolǵany týraly habar kelip tústi. Balalardyń denesin týystary ózennen taýyp, sýdan shyǵardy», - delingen Almaty oblystyq TJD baspasóz qyzmeti taratqan habarlamada.

Qutqarýshylar ata-analarǵa balalaryn sý qoımasy mańynda úlkenderdiń qaraýynsyz qaldyrmaýyn suraıdy. Búgingi tańda oblys aýmaǵyndaǵy muzdyń qalyńdyǵy adam salmaǵy úshin jetkiliksiz.

Osyǵan baılanysty azamattardan juqa muzǵa shyqpaýdy jáne qaýipsizdik erejelerin saqtaýdy eskertedi.

- Juqa jáne qatpaǵan muzǵa shyǵýǵa bolmaıdy.

- Muzdyń beriktigin aıaqpen teýip tekserýge bolmaıdy.

- Qarańǵy kezde, kórinbeıtin ýaqytta (tuman, qar jaýý, jańbyr) jáne mas kúıde muz betine shyǵýǵa bolmaıdy.

- Ózennen ótkende arnaıy muz ótkelderin paıdalaný kerek.

- Sý qoımasynan toppen óterde kezinde bir-birinen 5-6 metr qashyqty saqtaý qajet.

- Qatyp qalǵan ózendi (kóldi) shańǵymen ótken jón. Qajet bolǵan jaǵdaıda olardy tez sheshý úshin shańǵylardyń bekitpesin aǵytý kerek; shańǵy taıaqshalaryn qoldyń bilezik býynyna ilmekti ilmeı ustap, qaýip tóngen jaǵdaıda olardy birden laqytyryp tastaý kerek.

- Muzda balyq aýlaǵanda muzdy bir-birinen 5-6 metr qashyqta oıý qajet. Balyqshynyń qutqarý keýdeshesi, sondaı-aq uzyndyǵy 15-20 m, bir ushynda ilmegi bar jáne ekinshisinde 400-500 g júgi bar arqany bolýy tıis. Júk arqandy sýǵa qulap ketken jolaýshyǵa laqtyrýǵa kómektesedi.

- Juqa, shytynaǵan muz betinde qalsańyz, abaılap keri burylyp, syrǵanata júrip keri jaǵaǵa oralý kerek.

- Muzdaı sýǵa túsken adam 10-15 mınýttan keıin qatty tońyp qalýy, al 20 mınýttan keıin esinen tanyp qalýy múmkin ekenin bilý qajet.

Muzdyń beriktigin kózben anyqtaýǵa bolady:

1. Kók tústi muz – berik;

2. Aq tústi – beriktigi 2 ese az;

3. Kúńgirt-aq nemese sarǵysh tústi muz senimdi emes.