Almaty oblysynda Ózbekstan azamaty 105 maldy urlap ketken
«25 qazanda Jambyl aýdany polıtsııasynyń kezekshi bólimine Almaty qalasynyń 44 jastaǵy turǵyny aryzdanyp, 22 qazan kúni túnde jaıylymnan 105 bas qoıy urlanǵanyn aıtty.
Atalǵan derek QR Qylmystyq kodeksiniń 189-baby 3-bóligi 1-tarmaǵy boıynsha tirkeldi. Jedel-izdestirý is-sharalary barysynda atalǵan sharýa qojalyqta malshy bolyp jumys istegen Ózbekstan azamaty kúdikti retinde anyqtalyp, ustaldy. Kúdikti senip tapsyrylǵan 80 bas maldy júk kólikterin jaldap, kórshiles Jambyl oblysynyń Shý qalasyndaǵy mal bazarynda 78 basyn 3 276 000 teńgege saýdalaǵany belgili boldy. Sonymen qatar urlanǵan 25 bas qoı tabylyp, tárkilendi. Ustalǵan azamat bultartpas dálelderden keıin óz kinásin tolyq moıyndady»,- dedi Jambyl aýdandyq PB bastyǵy Ashat Danııar.
Tabylǵan mal zańdy ıesine qaıtaryldy. Kúdikti ýaqytsha ustaý oqshaýlaǵyshyna qamaqqa alyndy. Qazirgi tańda sotqa deıingi tergep-tekserý amaldary júrgizilip jatyr.