Almaty oblysynda óz otandasyn óltirdi degen kúdikpen shetel azamaty ustaldy
TALDYQORǴAN. QazAqparat - Almaty oblysynyń tártip saqshylary óz otandasyn óltirdi degen kúdikpen Ózbekstan Respýblıkasynyń 27 jastaǵy azamatyn ustady, dep habarlaıdy QazAqparat tilshisi.
Kisi ólimi bıylǵy 11 qańtarda Talǵar aýdanynda boldy. Qurylys nysandarynyń birinde túrli dene jaraqaty bar 43 jastaǵy er adamnyń denesi tabylǵan. Aldyn ala tergeý barysynda mert bolǵan sheteldik azamat Qazaqstanǵa 2019 jyly Ózbekstannyń Ándijan oblysynan kelgendigi jáne Qaınar aýylynda jeke turǵyn úı qurylysymen aınalysqandyǵy belgili boldy.
«Aýdandyq polıtsııa qyzmetkerleri adam ólimine qatysy bar degen kúdikpen jábirlenýshiniń 27 jastaǵy otandasyn ustady. QR Qylmystyq kodeksiniń 99-babyna sáıkes sotqa deıingi tergeý júrgizilip, qylmysqa qatysty barlyq mán-jaılar anyqtalatyn bolady. Ustalǵan er adam ýaqytsha ustaý ızolıatoryna qamaqqa alyndy», - dep málim etti Almaty oblystyq Polıtsııa departamentiniń baspasóz qyzmetinen.
Atalǵan fakti boıynsha qajetti saraptamalar taǵaıyndaldy. Oqıǵa ornynan as úı pyshaǵy tabylyp, tergeý materıaldaryna aıǵaqzat retinde tirkeldi.
