Almaty oblysynda oıyn avtomattaryna mıllıondaǵan teńgesin utqyzǵandar ákimdikke shaǵymdanýda
TALDYQORǴAN. QazAqparat - Almaty oblysynda oıyn avtomattaryna mıllıondap qarjy utylǵan bir top azamat qurylǵylardyń kózin joıýdy talap etýde, dep habarlaıdy QazAqparat tilshisi.
Shaǵymdanýshylar ondaı avtomattar mekteptiń qasynda, halyq kóp jınalatyn saýda oryndarynda kóp turǵanyn aıtady. Al ákimdik avtomattar jóninde zań oryndaryna hat joldaǵan.
Narazylyqy tanytqan turǵyndardyń keıbiri oıyn avtomattaryna mıllıondaǵan aqsha utylǵan. Olardyń aıtýynsha, aýyldaǵy dúkenderde termınaldyń 40-50-i tur deıdi. Turǵyndar ákimdikke de barǵan, zań oryndaryna da shaǵymdanǵan.
«Talaı ata-ana zar jylap otyr, balalary osyǵan kirip ketip. Onyń biri - menmin. Balamdy men ustaı almaı qaldym. Ózinen ózi aqshasynyń bárin osyndaıǵa joq qylyp, eń aqyry óz-ózine qol jumsap, qaıtys boldy «, - dedi Turar aýylynyń turǵyny Ońǵarbaı Erimbetov.
«Oıyn avtomattary talaı otbasyn oırandap ketti», deıdi jınalǵandar. «Aptasyna 20 myń, 30 myń tapsam, aptasyna osyǵan ketedi. Ony bári biledi. Otbasymen ajyrasyp, bala-shaǵamnan aıyrylyp qalamyn, qaıtyp qosylamyn. Sóıtip júrmin», - dedi Shamalǵan aýylynyń turǵyny Azamat Alpysbaev.
«Qanshama urlyq, tóbeles shyǵady. Kerek emes bul, alyp tastasyn. Men oınaǵaly úsh mıllıondaı aqsha salyp tastadym buǵan», - dedi sol aýyldyń turǵyny Salamat Qadyrov.
Úsh mıllıon teńge bul - Salamattyń alty aıda utylǵan qarjysy. Al taǵy bir jigittiń aǵasy 5 mıllıon teńge quıypty.
«Aýyl halqynan shaǵym jıi túsedi» degen ákimdik avtomattardyń jumysyn toqtata almaı otyr.
«Ekonomıkalyq tergeý departamentine hat joldadym. Maǵan jaýap ta keldi, mine, resmı hatym bar. Bul avtomattardyń barlyǵy - lotoreıa delingen, bunyń barlyǵyn zańǵa sáıkes tekserdik degen olar», - dedi Qarasaı aýdany Jibek joly okrýgi ákiminiń orynbasary Almat Qalabaev.
«Qurylǵylardyń ıesinen dúken ıeleri aı saıyn aqy alady» deıdi narazy top. Oıyn avtomattarynan ábden utylǵandar, qurylǵylardyń kózin joıýdy talap etýde.
