Almaty oblysynda oınap júrip sý tasýy saldarynan úılerine qaıta almaı qalǵan balalar qutqaryldy
Basrasóz qyzmetiniń málimetterine qaraǵanda, 18-aqpanda saǵat 18.15-te Almaty oblysy Tótenshe jaǵdaılar departamenti kezekshi bóliminiń pýltine Jambyl aýdanynyń Uzynaǵash aýylynda «Amanat» mal bazarynyń mańyn aryq jelisi arqyly erigen qar sýy tasyp, alańdy sý basýy saldarynan kámeletke tolmaǵan úsh er bala eldi mekennen jyraqta qalǵany týraly habarlama tústi.
Oqıǵa ornyna dereý TJ departamentiniń qyzmetkerleri jiberildi. TJD qyzmetkerleri oqıǵa ornyna kelgennen keıin balalardyń alańda oınap júrip, erigen qar sýynyń kóterilýi saldarynan úılerine ózdiginen orala almaǵany anyqtaldy.
«Jambyl aýdany TJB qyzmetkerleri men tehnıkasynyń kúshimen balalar qaýipsiz jerge evakýatsııalandy. Balalarǵa medıtsınalyq kómek qajet bolmady. Almaty oblysynyń TJD ata-analarǵa kámeletke tolmaǵan balalardy qaraýsyz qaldyrmaý qajettigin eskertedi»,-delingen habarlamada.