Almaty oblysynda otandyq vaktsınany 378 adam saldyrdy
TALDYQORǴAN. QazAqparat - Qazirgi kezde Almaty oblysynda otandyq vaktsınany 378 adam salǵyzdy, otandyq vaktsınany egý jumystary osy dúısenbiden bastalǵan bolatyn, dep habarlaıdy Almaty oblysy ákimdiginiń baspasóz qyzmeti.
Eske salsaq, «QazQovid-in» vaktsınasynyń eki komponentiniń 4000 dozasy óńirge ótken júmada jetkizilgen bolatyn. Bul osy aımaqta ornalasqan zaýyttan shyǵarylǵan alǵashqy partııa.
Oblystyq densaýlyq saqtaý basqarmasynyń málimetine súıensek, 146 adam Kerbulaq aýdandyq ortalyq aýrýhanada vaktsınanyń birinshi komponentin aldy, Kóksý OAA – 121, Taldyqorǵan qalalyq emhanasynda – 80, Tekeli OAA – 23, Qaratal OAA – 8 adam osy vaktsınany saldyrdy.
Oblystyq densaýlyq saqtaý basqarmasy basshysynyń orynbasary Arman Janseńgirovtiń aıtýynsha, otandyq vaktsınanyń ózgelerinen ereksheligi sol, ony +2-den +8 gradýsqa deıin saqtaýǵa bolady, bul onyń tasymaldaý, saqtaý jaǵdaılarynyń tıimdiligin kórsetedi. «Qazaqstandyq ǵalymdar daıyndaǵan bul vaktsınanyń belsendiligi joıylǵan», - dep túsindirdi maman.
Jalpy búgingi kúni Almaty oblysynda koronavırýsqa qarsy vaktsınalardyń 1-shi komponentin 134 253 adam, ІІ komponentin 17 596 adam saldyrdy. 253 egý pýnkti jumys isteıdi, sonyń 80-i jyljymaly pýnkt.
