Almaty oblysynda Otan aldyndaǵy boryshyn ótegen sarbazdardy shyǵaryp salý rásimi ótti

TALDYQORǴAN. QazAqparat - Almaty oblysy Jarkent qalasyndaǵy №2091 áskerı bóliminde Otan aldyndaǵy boryshyn ótegen sarbazdardy shyǵaryp salý rásimi ótti, dep habarlaıdy QazAqparat tilshisi.

Elimizdiń qarýly kúshteri qataryna 2015 jyldyń kúzinde shaqyrylǵan olar úsh aılyq oqý jattyǵýdan ótip, bir jyl boıy shekara qyzmetiniń qyr-syryna qanyqty. El tynyshtyǵyn kúzetken sarbazdarǵa áskerı bólim basshylyǵy rızashylyǵyn bildirdi. Shyǵys óńirlik qolbasshylyǵyna qarasty bul shekara otrıady osy jyldyń úzdigi atanǵan bolatyn. Osy oraıda, sarbazdardyń qosqan úlesi orasan. Sondyqtan, óz qyzmetin minsiz atqarǵan olarǵa alǵys hattar tabys etildi. Sońynan qaýipsizdik erejeleri túsindirilip, komandırleri barlyǵynyń óz úılerine aman-esen jetýlerine tilektestigin bildirdi. Árqaısysymen jeke dara qoshtasyp, aldaǵy ómirlerine sáttilik tiledi. 365 kúnin shekara shebinde ótkizgen sarbazdar sońǵy ret sappen júrip ótip, ózderin kútip turǵan avtobýstarǵa otyryp, úılerine jol tartty.