Almaty oblysynda órtten eki adam qaıtys boldy
TALDYQORǴAN. QazAqparat - Almaty oblysynda eki adam órtten kóz jumdy. Oqıǵa Taldyqorǵan jáne Uıǵyr aýdanynda bolǵan dep habarlaıdy QazAqparat tilshisi.
Taldyqorǵanda ótken táýlikte kóppáterli turǵyn úıdiń birinen órt shyqqan. Oqıǵa ornynan 1985 jylǵy azamattyń múrdesi tabyldy. Aldyn ala boljam boıynsha, ishimdik ishken er azamat temeki tartyp jatyp uıyqtap ketken kórinedi. Órttiń shyǵýyna osy jaıt sebep bolýy múmkin. Sebebi, máıit tabylǵan tósek mańynan ishimdik qumyrasy jáne temeki tuqyly tabylǵan.
Al Uıǵyr aýdanynyń Shonjy aýylyndaǵy turǵyn úıdiń birinde órt bolyp, oqıǵa ornynan 2007 jylǵy, ıaǵnı 10 jastaǵy balanyń múrdesi tabyldy. Atalǵan jerde órttiń shyqqany jóninde habar 28 aqpan kúni túngi on ekiler shamasynda túsken. Qazir osy eki fakti boıynsha sot-medıtsınalyq saraptama taǵaıyndalyp, órttiń shyǵý sebebi anyqtalýda.
