Almaty oblysynda órt sóndirýshimin dep aldap, aqsha jymqyrǵan eki alaıaq ustaldy
TALDYQORǴAN. QazAqparat - Almaty oblysynda ózin órt sóndirýshi dep tanystyrǵan alaıaqtar ustaldy, dep habarlaıdy Polisia.kz.
Er jáne áıel adam árdaıym bir qylmystyq shema boıynsha áreket etken. Olar azyq-túlik dúkenderine tekserispen kelip, onǵa jýyq dúken ıesin aldap ketken.
Eskeldi aýdany polıtsııa bóliminiń kezekshi bólimine aýdandaǵy aýyldardyń biriniń 46 jastaǵy azyq-túlik dúken ıesi eki belgisiz adamǵa qatysty shara qoldaný týraly aryzdanǵan. Ózderin órtke qarsy qyzmet qyzmetkeri dep tanystyrǵan kúdiktiler aldaý arqyly dúken ıesiniń aqshasyn qaltaǵa basqan.
– Qazirgi tańda jaqyn mańdaǵy aýyldardan taǵy birneshe aldanǵan dúken ıeleri anyqtaldy. Aldanǵandar tizimi áli de ulǵaıýy múmkin. Qylmystyq «dýet» árqashan bir shema boıynsha áreket etken. Ózderin órtke qarsy qyzmet qyzmetkerleri retinde tanystyrǵan kúdiktiler, fotosýretteri men mórleri bar qyzmettik kýálikterin zardap shegýshiler naqty tanysa almaıtyndaı kórsetip, birden tekserýge kirisip, túrli zańbuzýshylyqtardy taba bastaǵan. Keıbirinde órt sóndirý quraly bolmaǵan, al ózgelerinde órt sóndirgishtiń merzimi ótip ketken. Olar tipti peshpen jylytý orny aǵash konstrýktsııalarynyń ottan qorǵaý quraldary joqtyǵyna jáne odan ózge máselelerge qatysty zańbuzýshylyqtardy tapqan. Sodan keıin máseleni beıbit túrde, hattama jasamaı sheshýdi usynyp, jábirlenýshilerdi aqsha berýge ıtermelegen. Qalaǵanyn alǵannan keıin olar óz betimen kete barǵan, – deıdi Almaty oblysy Eskeldi aýdany polıtsııa bóliminiń bastyǵy Janat Qudaıbergenov.
Alaıaqtardy anyqtaý úshin tájirıbeli qyzmetkerlerden jedel-tergeý toby qurylyp, kúdiktiler qysqa ýaqyt aralyǵynda Almaty qalasynyń kóshelerinen ustaldy.
Kúdiktiler - Sarqan aýdanynyń 35 jastaǵy jáne Taraz qalasynyń 26 jastaǵy turǵyny. Olar ońtústik astanada jaldamaly páterde birge turǵan.
Ustalǵan adamdar qamaqqa alyndy. Sotqa deıingi tergeý amaldary barysynda ustalǵandardyń oblys aýmaǵyndaǵy basqa da uqsas qylmystarǵa qatysy bar-joǵy tekseriledi. Qylmystyq is QR QK 190-baby 3-baby 4-tarmaǵy boıynsha tergelip jatyr.
