Almaty oblysynda órt sóndirýshi naýqas balany aman alyp qaldy
TALDYQORǴAN. QazAqparat - Almaty oblysynyń Balpyq bı aýylynda órt sóndirýshi «qurysý sındromyna» ushyraǵan jasóspirimniń ómirin saqtap qaldy. Oqıǵa qutqarýshynyń turǵyn úı sektoryn aralaý barysynda boldy, dep habarlaıdy QazAqparat tilshisi.
Almaty oblystyq TJD baspasóz qyzmetiniń málimetinshe, oqıǵa Kóksý aýdanynyń ortalyǵy Balpyq bı aýylynda 6 naýryz kúni bolǵan. Órt sóndirýshi Nurjan Sapash Jeksembaevtar otbasynyń úıine kelip, esikti qaǵa bastaıdy. Dál osy sátte 2004 jyly týǵan Temirlan uıqyda denesi qurysyp jatqan. Esik qaǵysynan aldymen Temirlannyń aǵasy birinshi oıanǵan. Ustamasy bastalǵan inisin kórip, esi shyǵyp dereý kómek shaqyrǵan.
«Osy sátte №32 órt sóndirý bóliminiń qyzmetkeri alǵashqy medıtsınalyq kómek kórsetti. Qarysyp qalǵan aýzyn ashyp, tilin jutqyzbaı, tynys alý joldaryn bosatqan. 1998 jyly týǵan Nurjan Sapashtyń tótenshe jaǵdaıda abdyrap qalmaı, batyl áreket etýiniń arqasynda adam ómirin saqtap qaldy. Bul ózge áriptesterine úlgi»- deıdi, sala mamandary.
