Almaty oblysynda órt shyqqan úıden bir otbasy músheleri qutqaryldy
TALDYQORǴAN. QazAqparat – Almaty oblysynda órt shyqqan úıden bir otbasy músheleri qutqaryldy, dep habarlaıdy QazAqparat tilshisi.
Almaty oblystyq Polıtsııa departamenti baspasóz qyzmetiniń málimetinshe, Jambyl aýdanynyń patrýldik polıtseıleri ákimshilik aýmaqty avtopatrýldeý kezinde tańǵa jýyq B. Qydyrbekuly aýyly turǵyndarynyń kóshege jappaı shyǵyp jatqanyn baıqaǵan. Jedel oqıǵa ornyna jetkende kópqabatty úıdiń jertólesinen órt shyqqanyn anyqtap, tótenshe jaǵdaı qyzmetin kómekke shaqyrǵan.
Talap boıynsha turǵyndardyń qaýipsizdigin qamtamasyz etý maqsatynda ýchaskelik polıtsııa ınspektory syrtta qalyp, onyń sol kúngi seriktesi patrýldik polıtsııa ınspektory Asanjan Sadyqov shuǵyl túrde páterlerdi aralaýǵa kirisken.
«Tórt qabatty úıdiń kireberisi tútinge toly boldy. Eshteńe kórinbedi. Degenmen, páterlerdi aralaı bastadym. Ekinshi qabatqa shyqqanda balanyń daýysy estildi. Birden tórtinshi qabatqa júgirdim. Páterge kirgende eki balasy bar áıeldi kórdim. Olar esi shyǵyp, shyǵatyn jol tappaı qalǵan. 3 jáne 5 jastaǵy eki qyzdyń birin men, ekinshisin órt sóndirýshi qyzmetker kóterip, áıeldi jetektep dalaǵa shyqtyq», - dedi polıtsııa kishi leıtenanty Asanjan Sadyqov.
Órt sóndirýshilerdiń aqparaty boıynsha, órtengen aýmaq az ǵana bolǵanymen, oqıǵanyń tańǵy ýaqytta oryn alýy jáne tútinniń taralýy óte úlken qaýip tóndirgen. Qajetti kómektiń der kezinde jetip, shuǵyl sharalardyń qabyldanýy arqasynda turǵyndar zardap shekken joq.
