Almaty oblysynda ónerkásip óndirisiniń kólemi 540 mlrd teńgege jetti
TALDYQORǴAN. QazAqparat- Almaty oblysynyń ákimi Amandyq Batalovtyń tóraǵalyǵymen ótken jıynda bıylǵy jyldyń 9 aıyndaǵy oblystyń áleýmettik-ekonomıkalyq damý qorytyndylary men 4-shi toqsanǵa qoıylǵan mindetter talqylandy, dep habarlaıdy QazAqparat tilshisi oblys ákiminiń baspasóz qyzmetine silteme jasap.
Negizgi baıandamany oblystyq ekonomıka jáne bıýdjettik josparlaý basqarmasynyń basshysy Jomart Ámirhanov jasady. J. Ámirhanovtyń aıtýynsha, oblysta ónerkásip óndirisiniń kólemi 540,0 mlrd teńgeni qurady. 44 jańa nysan iske qosylyp, jumys istep turǵan 25 nysan keńeıtildi, qosymsha 1191 jumys orny quryldy. Karta sheńberinde quny 55 mlrd teńge bolatyn 7 joba paıdalanýǵa berilip, 1475 jumys orny quryldy. Búgingi kúni 2 nysan iske qosyldy - Qaratal aýdanyndaǵy «Almaty Shyny» jáne metall qurastyrylymdaryn óndiretin «PSI StroyIndustry» zaýyttary. Aýyl sharýashylyǵynda jalpy ónim 459,6 mlrd teńge bolyp, ósim 1,6% qurady. Bıylǵy jyly AÓK nysandaryna bólingen memlekettik qoldaý bıýdjettik qarjysy 33,9 mlrd teńge, onyń ishinde sýbsıdıı - 25,7 mlrd teńge.
9 aıdyń ishinde oblys ekonomıkasyna 349,8 mlrd teńge ınvestıtsııa tartyldy, naqty kólem ındeksi 89,4%. Bıýdjetten tys ınvestıtsııa tartý joldarynyń biri - memlekettik-jekeshelik áriptestikti damytý. Qazirgi kezde oblys qorjynynda jalpy quny 216 mlrd teńgeniń 33 jobasy bar.
Sonymen qatar baıandamashy shaǵyn jáne orta bıznesti, áleýmettik jáne turǵyn úı-kommýnaldyq sharýashylyq salalaryn damytý, qurylys kólemin arttyrý máseleleri týraly aıtyp ótti.
