Almaty oblysynda on esekti urlap satqan kúdikti ustaldy
TALDYQORǴAN.QazAqparat - Almaty oblysynda esek satýmen aınalysqan kúdikti ustaldy, dep habarlaıdy QazAqparat tilshisi.
Atalǵan derek Uıǵyr aýdanynda tirkeldi. Maýsym aıynyń ortasynda bir túnde Úlken Dıqan aýylynan belgisiz bireý jaıylymda júrgen 10 esekti úptep ketken. Turǵyndardyń der kezinde polıtsııaǵa júgingeniniń nátıjesinde qylmysqa qatysy bar tulǵa anyqtaldy.
«Jedel izdestirý sharalary negizinde Uıǵyr aýdanynyń polıtseıleri atalǵan qylmysty jasady degen kúdikpen Shonjy aýylynyń 30 jastaǵy turǵynyn ustady. Tergeý barysynda urlanǵan esekterdiń arzan baǵaǵa Talǵar aýdanynda satylǵany belgili boldy. Urlanǵan maldy satyp alýshy da anyqtaldy jáne qoldy bolǵan janýarlar óz ıesine qaıtaryldy», - dep málimdedi oblystyq Polıtsııa departamentiniń baspasóz qyzmeti.
Atalǵan qylmystyq is Uıǵyr aýdany polıtsııasynyń óndirisinde. Qazirgi ýaqytta ustalǵan kúdiktiniń ózge de qylmystarǵa qatysy bary anyqtalyp jatyr.
Oblystyq polıtseıler urlanǵan múlikti satyp alýmen aınalysty degen kúdikke ilingen Talǵar aýdanynyń turǵynyn da jaýapkershilikke tartý máselesin kóteretinin jetkizdi.
