Almaty oblysynda oqýshysy sýıtsıd jasamaq bolǵan mektepke mınıstrlik ókilderi bardy

ASTANA. QazAqparat – Almaty oblysynda oqýshysy dári iship, sýıtsıd jasamaq bolǵan mektepke Oqý-aǵartý mınıstrliginiń departament basshysy bardy, dep habarlaıdy QazAqparat tilshisi.

«Almaty oblysyndaǵy jábirlenýshi balanyń anasy mektep dırektory isti jabý úshin ózine aqsha usynǵanyn aıtty. Qabyldap jatqan sharalar osyndaı keleńsizdikterdiń aldyn alýǵa kepil bola ala ma?» - dep surady BAQ ókili ortalyq kommýnıkatsııalar qyzmetinde ótken brıfıngide.

Vıtse-mınıstrdiń aıtýynsha, atalmysh mekteptegi jaǵdaı mınıstrliktiń tikeleı baqylaýyna alynǵan.

«Siz aıtqan jaǵdaıǵa kelsek, quqyq qorǵaý organdary tıisti tergeý amaldaryn bastap, jumys júrgizýde. Bizdiń mınıstrlik tarapynan oqıǵa tirkelgen kúnnen bastap arnaıy komıssııa jumys istep jatyr. Búgin ózerińiz kýá bolǵandaı, dál sol oqıǵa bolǵan mektepte mınıstrliktiń Tárbıe isi jónindegi departamentiniń basshysy keshendi jumystar uıymdastyryp otyr», - dedi Edil Ospan.

Atalmysh basqarma basshysy tikeleı efırge oqıǵa ornynan qosylyp, atqarylyp jatqan jumystar týraly málimet berdi.

«Qazir biz ár ata-anamen onyń ishinde jábirlenýshi jaqpen de, sol eki balanyń ata-anasymen de kezdesip, tikeleı jumys júrgizip jatyrmyz. Tergep-tekserý jumystarynyń qorytyndysyn aldaǵy ýaqytta habarlaımyz», - dedi mınıstrlik ókili.

Eske salsaq, Almaty oblysynda bastaýysh synyp oqýshysy bir qorap dári iship, ómirimen qoshtaspaq bolǵan edi.

Jergilikti prokýratýra atalǵan olqylyqqa jol bergen sala basshylaryn jazalaý týraly usynys engizdi.