Almaty oblysynda oqýshyny urǵan muǵalimniń isi toqtatyldy

Balasyn urǵandyǵy týraly aryz túsirgen ata-ana shaǵymdaryn keri qaıtaryp aldy, dep habarlaıdy QazAqparat tilshisi.

Ustazdan taıaq jegen uldyń ata-anasy quzyrly organǵa shaǵymdanǵannan keıin, muǵalim de olardyń ústinen aryz túsirgen. Sońynda qos tarap ózara tatýlasyp, shaǵymdaryn qaıtaryp aldy.

«Sot medıtsınalyq-saraptamaǵa qatyspaımyz jáne bir-birimizge ókpemiz joq, tatýlastyq degen turǵyda eki jaqtan da ótinish túsken. Qazirgi ýaqytta QR Qylmystyq protsessýaldyq kodeksiniń 35-babyna sáıkes is toqtatyldy», - dep málim etti oblystyq ІІD baspasóz qyzmetiniń jetekshisi Aıman Myrzekova. 

Esterińizge sala keteıik, áleýmettik jelide belgisiz áıel adamnyń oqýshyny tópelep uryp jatqany týraly beınejazba tarap, kópshiliktiń narazylyǵyn týǵyzǵan edi. Sońynan anyqtalǵandaı,  oqýshy men muǵalim arasyndaǵy kıkiljiń Іle aýdanyna qarasty Baıserke aýylyndaǵy №9 mektepte oryn alǵan. Oblystyq bilim basqarmasynyń bergen aqparatyna sáıkes, muǵalimnen taıaq jegen shákirt  ustazdyń qyzyn urǵan kórinedi. Osy áreketi úshin ashýǵa býlyqqan ana úzilis kezinde synypqa kelip, balaǵa esesin qaıtarǵan.  Balasyn jaqtaǵan muǵalim Mıra Mamedalıeva jumystan shyǵaryldy. Al muǵalimnen taıaq jegen balanyń ata-anasy polıtsııa bólime baryp, aryz jazǵan. Artynsha ustazdyń ústinen QR Qylmystyq kodeksiniń 107-babymen (densaýlyqqa qasaqana aýyrlyǵy ortasha zııan keltirý) is qozǵalǵan bolatyn.