Almaty oblysynda oqýshyny mektep aýlasynda ıt talady
TALDYQORǴAN. QazAqparat - Almaty oblysynda oqýshy mektep aýlasynda ıtke talandy. Oqıǵa Qarasaı aýdanyndaǵy Raıymbek aýylynda bolǵan, dep habarlaıdy QazAqparat tilshisi.
2-synyp oqýshysy Ǵanı Manarbektiń aıtýynsha, ol úzilis kezinde daladaǵy ájethanaǵa shyqqan. Sol sátte daladaǵy qańǵybas ıt 7 jastaǵy balaǵa tap bergen. Qazir zardap shekken oqýshy úıinde em alyp jatyr.
«Balanyń jaǵdaıy jaqsy. Qazir osy oqıǵaǵa baılanysty mektep dırektory eskertý aldy. Óıtkeni mekteptiń aýlasy 2013 jyly qorshalǵan. Qorshalǵan jerge ıtter qaıdan kelgen jáne kúzetshi qaıda qarap otyr. Osynyń barlyǵy eskerilip, mektep dırektoryna arnaıy buıryqpen eskertý jarııalandy. Sondaı-aq aıta ketkim keledi, bilim ordasyna aldaǵy ýaqytta kúrdeli jóndeý júrgiziledi. Qazir jobalyq-smetalyq qujatyna 32 mln teńge qarjy bólindi. Al dárethana mekteptiń ishinde de bolady dep aıta aımaımyn. Sebebi ol ázirge belgisiz», - dedi Almaty oblystyq Bilim basqarmasynyń bas mamany Roza Turǵanbaeva.
Aıta ketý kerek, Raıymbek aýylyndaǵy Kenen Ázirbaev atyndaǵy mektepte 1 282 bala oqıdy.
«Al aýyldaǵy qańǵybas ıtterdiń kózin joıý úshin tıisti organdarǵa hat joldandy», - dedi oblystyq bilim basqarmasy.
