Almaty oblysynda oqýshyny kóligimen qaǵyp, qashyp ketken júrgizýshi ustaldy
TALDYQORǴAN. QazAqparat -Almaty oblysynda oqýshy qyzdy kóligimen qaǵyp, qashyp ketken júrgizýshi ustaldy. Qazir 21 jastaǵy stýdent tártip saqshylaryna túsinikteme berýde, dep habarlaıdy QazAqparat tilshisi.
Oqıǵa 31-shi jeltoqsannan qańtardyń 1-ne qaraǵan túni bolǵan. Іle aýdanyndaǵy Baıserke aýylynda 16 jastaǵy qyzdy kólik qaǵyp, oqıǵa ornynan qashyp ketken. Kámelet jasyna tolmaǵan balanyń janynda anasy bolǵan. Jábirlenýshi aýyr jaraqatymen aýdandyq aýrýhanaǵa jetkizildi.
«Qyzdyń anasy tek kóliktiń túsin ǵana aıtty. Al bizdiń mamandar oqıǵa ornynan kólik jaryǵynyń synyqtaryn taýyp, mashınanyń markasy «Aýdı» ekenin anyqtady. Kóshedegi beınebaqylaý kameralarynyń kómegimen oqıǵa ornynan qashyp ketken júrgizýshi de qolǵa tústi. 21 jastaǵy jigit Almaty qalasyndaǵy JOO stýdenti eken»,- dep málim etti oblystyq ІІD baspasóz qyzmeti.
Qazir oqýshy qyzdy qaqqan kólik arnaıy turaqqa qoıyldy. Mamandar júrgizýshiniń oqıǵa ornynan qashyp ketkeni tergeý barysynda mindetti túrde eskeriledi dep otyr. Al zardap shekken 16 jastaǵy oqýshy áli dárigerlerdiń baqylaýynda.
