Almaty oblysynda oqýshy qyzdy zorlaýǵa qatysty is sotta qaralýda
TALDYQORǴAN. QazAqparat - Almaty oblysynda oqýshy qyzdy 11 synyptyń balasy zorlap ketti dep aıyptalýda. Oqıǵa Panfılov aýdanynda bolǵan. Іsti bolyp jatqan jasóspirim de, qyz da bir mekteptiń oqýshylary, dep habarlaıdy QazAqparat tilshisi.
Qazir atalǵan iske baılanysty Taldyqorǵanda sot otyrysy júrip jatyr. Jaǵa ustatarlyq jaǵdaı tamyz aıynda bolǵan. Jábirlenýshi tarap is burmalanyp ketedi dep qaýiptenip otyr.
«Qazir myna aıyptalýshy tarap barlyq jaǵdaı qyzdyń kelisimimen bolǵan dep otyr. Olar bılikti satyp alamyz deıdi. Bizdiń ar-namysymyz qorlanǵany azdaı, endi bylaı dep jatyr. Biz zańsyzdyqqa jol bermeımiz», - deıdi jábirlenýshiniń týysy.
Al jábirlenýshiniń zańdy ókili Kámshat Esmuhanbetqyzy jigittiń bastapqyda múldem kinásin moıyndamaı qoıǵanyn aıtady.
«Ana balaǵa aıaýshylyq tanytpaıdy emes, tanytar edik. Bul jerde bala kinásin bastapqyda moıyndamaı qoıdy. Keıin tergeý amaldary bastalǵannan soń, medıtsınalyq saraptama shyqqan soń ǵana kinásin moıyndady», - deıdi ol.
Al aıyptalýshy tarap oqýshylar qyz ben jigit retinde kezdesip júrgen degendi aıtady. Biraq sot bitpeıinshe suhbat bere almaıtyndaryn jetkizdi. Jábirlenýshi taraptyń sózinshe, aıyptalýshy jetkinshek qyzben «VKontakte» áleýmettik jelisi arqyly sóılesip júrgen kórinedi. Túngi on ekiler shamasynda oqýshy qyzdy kezdesýge shaqyrǵan kúdikti aldymen aram pıǵylyn júzege asyryp, artynsha ózi úıge ákep tastaǵan. Bıyl 8-shi synypqa oqýy tıis qyz áli mektepke de bara almaı otyr. Al, bıyl 11 synypqa baryp, partada otyrýy tıis Ernar qazir aıyptalýshy oryndyǵynda. Kámelettik jasqa tolmaǵan jasóspirimniń soty jabyq rejimde ótip jatyr. Kelesi sot otyrysy 18-shi qazanda jalǵasady.
