Almaty oblysynda oqýshy qyzdy zorlap ketti
TALDYQORǴAN.QazAqparat - Almaty oblysynda oqýshy qyzdy 11 synyptyń balasy zorlap ketti dep aıyptalýda. Oqıǵa Panfılov aýdanynda bolǵan. Іsti bolyp jatqan bala da, zorlanǵan qyz da bir mekteptiń oqýshylary, dep habarlaıdy QazAqparat tilshisi.
Qazir atalǵan iske baılanysty Taldyqorǵanda sot otyrysy júrip jatyr. Jaǵa ustatarlyq jaǵdaı tamyz aıynda bolǵan. Jábirlenýshi tarap is burmalanyp ketedi dep úreılenýde.
«Qazir myna aıyptalýshy tarap barlyq jaǵdaı qyzdyń kelisimimen bolǵan dep otyr. Bizdiń ar-namysymyz taptalǵany azdaı, endi bylaı dep jatyr. Biz zańsyzdyqqa jol bermeımiz», - deıdi jábirlenýshiniń týysy.
Al jábirlenýshiniń zańdy ókili Kámshat Esmuhanbetqyzy jigittiń bastapqyda múldem kinásin moıyndamaı qoıǵanyn aıtady.
«Ana balaǵa aıaýshylyq tanytpaıdy emes, tanytar edik. Bul jerde bala kinásin bastapqyda moıyndamaı qoıdy. Keıin tergeý amaldary bastalǵannan soń, medıtsınalyq saraptama shyqqan soń ǵana kinásin moıyndady», - deıdi ol.
Al aıyptalýshy tarap oqýshylar qyz ben jigit retinde kezdesip júrgen degendi aıtady. Biraq sot bitpeıinshe suhbat bere almaıtyndaryn jetkizdi. Jábirlenýshi taraptyń sózinshe, aıyptalýshy jetkinshek qyzben "Vkontakte" áleýmettik jelisi arqyly sóılesip júrgen kórinedi. Túngi on ekiler shamasynda oqýshy qyzdy kezdesýge shaqyrǵan kúdikti aldymen aram pıǵylyn júzege asyryp, artynsha ózi úıge ákep tastaǵan. Bıyl 8-synypqa barýy tıis oqýshy qyz áli mektepke de bara almaı otyr. Al, bıyl 11 synypqa baryp, partada otyrýy tıis Ernar qazir aıyptalýshy oryndyǵynda. Kámelettik jasqa tolmaǵan jasóspirimniń soty jabyq rejımde ótip jatyr. Kelesi sot otyrysy 18 qazanda jalǵasady
