Almaty oblysynda oqýshy qyz úıinen qashýdy ádetke aınaldyrǵan
TALDYQORǴAN. QazAqparat - Almaty oblysynda úıinen qashýdy ádetke aınaldyrǵan oqýshy tabyldy, dep habarlaıdy QazAqparat tilshisi.
Anyqtalǵandaı, ata-anasymen renjisken 15 jastaǵy qyz úıden shyǵyp ketip, oralmaǵan. Oqıǵa Talǵar aýdanyndaǵy Jalǵamys aýylynda boldy. Alǵashqyda balasyn ata-anasy aýyl aımaqtan ózderi izdegen. Nátıje bolmaǵan soń polıtseılerge habarlaǵan. 19 qańtarda joǵalǵan jasóspirim 3 kúndik izdeýden soń ǵana tabyldy.
«Qyz bala Almatynyń Bostandyq aýdanynda júrgen jerinen tabyldy. Qazir kámelettik jasqa tolmaǵan bala ata-anasymen birge. Oqýshy buǵan deıin de birneshe ret úıinen qashyp ketken. Polıtseıler osy jaıtqa baılanysty tıisti shara qoldaný úshin tolyqtaı mán-jaıdy anyqtaýda», dep málim etti oblystyq ІІD baspasóz qyzmeti.
Tártip saqshylarynyń málimetinshe, oblysta jańa jyldan beri iz-túzsiz ketken 18 adam tabylǵan. Onyń 13-i 2017 jyly joǵalyp, izdeý jarııalanǵandar.
«Kóbine ishimdikke salynǵan, psıhıkalyq aýytqýy bar adamdar joǵalady. Sondaı-aq jaqyndarymen renjisip, úıden qashatyndar da jıi kezdesedi. Aıta ketken jón, izdeý jumystaryna BAQ ókilderi men qoǵamnyń kómegi kóp», - dedi oblystyq ІІD-i izdeý bóliminiń jedel ýákili, polıtsııa kapıtany Dáýlet Amanǵalıev.
