Almaty oblysynda oqýshy qyz qart ájeni soqqyǵa jyqty
TALDYQORǴAN.QazAqparat - Almaty oblysynda 11-synyp oqýshysy qart ájeni soqqyǵa jyqty. Oqıǵa Іle aýdanyndaǵy Mereı saıajaıynda bolǵan. 70-ten asqan ájeniń qolyn qaıyryp, saýsaǵyn syndyryp, basyn jarǵan qyzdy tóbeles kezinde kórshileri áreń ajyratqan, dep habarlaıdy QazAqparat tilshisi.
Jeti qyz, bir uldy ómirge ákelgen batyr ana ómiri mundaı qorlyq kórgen joqpyn dep shoshyp otyr.
«Uryp, uryp kelistirip, belimnen tepti, bir kezde basymnan túsip qalǵan oramalmen qylqyndyrdy... Arasynda, arasynda kórem bylaı. Bolǵany, taıaqty jep, dalada bet-aýzym qan boldy. Sol kezde úlken kisiler kelmegende óltiretin edi», - dedi jábirlenýshi Qalyshbıke Aıymbetova.
Qazir zeınetker Іle aýdanyndaǵy ortalyq aýrýhananyń jaraqat bóliminde em alyp jatyr. Ony munda oqıǵa bolǵan kúni jedel járdem kóligimen jetkizgen.
«Naýqas Aıymbetova 21-shi qyrkúıek kúni jabyq mı jaraqatymen tústi bizge. Saýsaǵy synǵan. Em alyp jatyr», - dedi Іle aýdandyq ortalyq aýrýhanasy dırektorynyń emdeý isi jónindegi orynbasary Aıdar Soltanǵazıev.
Atalǵan oqıǵaǵa qatysty quqyq qorǵaý organdary kúdiktiniń ústinen Qylmystyq Kodekstiń 107-baby boıynsha sotqa deıingi tergeý júrgizip jatyr. Almaty oblystyq ІІD baspasóz qyzmetiniń málimetinshe, kúdikti anyqtaldy.
«Ol kámelettik jasqa tolmaǵan jasóspirim. Qazirgi tańda atalǵan faktige sáıkes tıisti saraptamalar taǵaıyndalǵan. Olardyń nátıjesi boıynsha naqty protsessýaldy sheshim qabyldanatyn bolady.Atalǵan is oblystyq ІІD -niń baqylaýyna alyndy», - dep málimdedi atalǵan vedomstvadan.
Jábirlenýshi Qylyshbıke Aıymbetovanyń aıtýynsha, kıkiljiń órimdeı qyzdyń maldy baý-baqshasyna kirgizip jiberýinen bolǵan.
Aıta ketý kerek, oqýshy qyzdan taıaq jep, qansyrap otyrǵan ájeıdiń vıdeosy áleýmettik jeli arqyly tarady. Ony zeınetkerge alǵashqy kómek kórsetken kórshileri túsirgen.
