Almaty oblysynda oqýshy bala jarty aıdan beri izdestirilýde
TALDYQORǴAN. QazAqparat - Almaty oblysynda iz-túzsiz joǵalǵan 10-synyp oqýshysy jarty aıdan beri tabylmaı jatyr, dep habarlaıdy QazAqparat tilshisi.
«2004 jyldyń 30 qazany kúni týǵan Jumasyl Erasyl Serikqalıulynyń iz-túzsiz joǵalǵany týraly habar polıtsııaǵa 10 qyrkúıekte kelip tústi. Sodan beri jasóspirim bala izdestirilýde», - dedi Almaty oblystyq Polıtsııa departamentiniń baspasóz qyzmetinen.
16 jastaǵy jasóspirim Sarqan aýdany, Cherkask aýylyndaǵy úıinen 9 qyrkúıekte shyǵyp ketip, qaıtyp oralmaǵan.
Ol Cherkask aýylynyń Tynyshbaev atyndaǵy mekteptiń 10-synybynda oqıdy.
Ústinde qyzyl tústi sporttyq kúrteshe, qara tústi jeńil kýrtka, qara tústi trıko, aıaǵynda aqshyl kók tústi sporttyq aıaq kıim bolǵan. Boıy – 170 sm, shashy qońyr tústi.
«Osy derek boıynsha qazirgi kezde izdeý jumystary jalǵastyrylýda», - dedi departamentten.
Polıtseıler Erasyl jaıly qandaı da bir aqparatqa ıe azamattardan dereý polıtsııaǵa habarlasýdy suraıdy.
