Almaty oblysynda oqýshy 16 jastaǵy balany pyshaqtady degen kúdikpen ustaldy
TALDYQORǴAN.QazAqparat - Almaty oblysynda joǵary synyptyń oqýshysy 16 jastaǵy balany pyshaqtady degen kúdikpen ustalyp, qamaýǵa alyndy. Qazir 17 jastaǵy oqýshynyń ústinen adam óltirýge oqtalý baby boıynsha qylmystyq is qozǵalyp, tergeý jumystary júrgizilip jatyr, dep habarlaıdy QazAqparat tilshisi.
Іs materıalyna sáıkes, 21 qarasha kúni birneshe jerinen pyshaqtalǵan 16 jastaǵy bala Talǵar qalasyndaǵy aýrýhanaǵa túsken. Zardap shekken jasóspirim osy qaladaǵy kolledjderdiń birinde oqıdy eken. Jedel isdestirý barysynda talǵarlyq polıtseıler 16 jastaǵy balanyń qaladaǵy avtovokzal mańynda belgisiz bireýmen tóbelesip, sol jerde ol birneshe pyshaq jaraqatyn alǵanyn anyqtady.
«Talǵar aýdandyq ІІB-niń polıtseıleri kúdikti azamatty eki táýlik ishinde anyqtady. Qazir kúdikti retinde 17 jastaǵy joǵary synyptyń oqýshysy tergelýde. Ol Raıymbek aýdanyndaǵy mektepterdiń birinde oqıdy. Qazir kúdikti oqýshy ustalyp, qamaýǵa alyndy» dep málim etti oblystyq ІІD baspasóz qyzmeti.
Al kúdiktiden alynǵan qalta pyshaǵy aıǵaq zat retinde tirkeldi. Іspen Talǵar aýdannyń tergeýshileri aınalysýda. Al zardap shekken jasóspirimniń jaǵdaıy aýyr.
