Almaty oblysynda nóser jaýynnan soń eki aýyldy sý basty
TALDYQORǴAN. QazAqparat - Almaty oblysynda bolǵan nóser jaýynnyń saldarynan Panfılov aýdanyndaǵy eki aýyldy sý basty, dep habarlaıdy «QazAqparat» HAA.
«Almaty oblysynyń Tótenshe jaǵdaılar qyzmetinen túsken aqparat boıynsha, 26 mamyr kúni nóser jaýynnyń saldarynan Panfılov aýdanynyń Kóktal aýylynda arnalarda sý deńgeıi kóterildi. Aǵyn sýdyń mol kólemde kelýine baılanysty 46 aýla men 11 úıdi sý basty», - dep habarlady QR ІІM Tótenshe jaǵdaılar komıtetiniń ókili Rýslan Imanqulov.
Ol taratqan málimetter boıynsha, Tótenshe jaǵdaılar salasy qyzmetkerleri men jergilikti atqarýshy organdardyń kúshimen sý basqan aımaqtardy tazartý jumystary júrgizilip jatyr. Sý ázirge kelip jatqan joq. Sonymen qatar osy kúni saǵat 17-00 men 18-30 mınýt aralyǵynda taýly aımaqtarda mol kólemde jaýǵan jańbyrdyń saldarynan Áýlıeaǵash aýylyn da sý basty.
Sonyń saldarynan 7 aýla men 1 turǵyn úı sý astynda qaldy. Atalmysh aımaqtarda sýdan tazartý úshin Almaty oblystyq Tótenshe jaǵdaılar departamentiniń 9 qyzmetkeri men 1 tehnıkasy jáne jergilikti atqarýshy organdardyń 4 qyzmetkeri men 2 tehnıkasy jumyldyryldy. Sý basýdyń saldarynan qulaǵan nemese buzylǵan qurylys nysandary tirkelgen joq. Sondaı-aq zardap shekkender men mert bolǵandar da joq.
