Almaty oblysynda «Nıva» dámhanaǵa soǵyldy
TALDYQORǴAN. QazAqparat - Almaty oblysynda «Nıva» avtokóligi joldyń boıynda turǵan dámhanaǵa soǵylyp, kirpish qabyrǵasyn qıratty, dep habarlaıdy QazAqparat.
Oqıǵa Boraldaı áýejaıyna qarama-qarsy Іle aýdanynyń Aerodromnaıa kóshesinde bolǵan.
Avtokólik Aerodromnaıa kóshesimen soltústikke qaraı baǵyt alǵan. Kýágerlerdiń aıtýynsha, júrgizýshi rólge ıe bola almaı qalǵan bolýy kerek. Olardyń baǵamdaýynsha, júrgizýshiniń densaýlyǵy syr bergen bolýy múmkin, sebebi rólde 70-ten asqan egde adam otyrǵan. Sondaı-aq, kólik salonynda jasóspirim men 7 jasqa tolmaǵan eki bala otyrǵany anyqtaldy.
Belgili bolǵandaı, «Nıva» kóligi joldyń jıektasynan ótip, kóshe boıynda turǵan dámhanaǵa baryp soǵylǵan. Qatty soqqydan dámhananyń kirpish opyrylyp qaldy.
Kólikte bolǵan úsh adam Almaty oblysynyń jaqyn mańdaǵy aýrýhanalarynyń birine jetkizildi.
