Almaty oblysynda Muqan Tólebaev atyndaǵy respýblıkalyq baıqaý bastaldy
TALDYQORǴAN. QazAqparat - Almaty oblysynda KSRO Halyq ártisi, kompozıtor Muqan Tólebaev atyndaǵy respýblıkalyq baıqaý bastaldy. «Altyn taıaqsha» jáne «Kesteli oramal» atty dodada vokalıst ánshiler men dırıjerlar baq synasady. Elimizdiń túkpir-túkpirinen 40-qa jýyq ónerpaz qatysýda, dep habarlaıdy QazAqparat tilshisi.
Sharanyń basty maqsaty úlken orkestrdi basqaratyn dırıjerlardy iriktep, olardy jan-jaqty demeý. Sondaı-aq osyndaı orkestrdiń súıemeldeýimen oryndaıtyn ánshilerge jiger berý. Uıymdastyrýshylar 4-shi jyl qatarynan ótkizilip otyrǵan baıqaýdyń deńgeıi de joǵarylaǵanyn aıtady. Ónerpazdardy baǵalaıtyn qazylar alqasyna halyqaralyq deńgeıdegi bilikti mamandar shaqyryldy. Qazylar alqasynyń músheliginde Ózbekstan Respýblıkasynyń halyq ártisi, professor, dırıjer Farýh Sydyqov, QR Eńbek sińirgen qaıratkeri, professor, dırıjer Álı Alpysbaev jáne QR Eńbek sińirgen qaıratkeri, professor Azamat Jyltyrkózov syndy mýzyka salasynyń maıtalmandary bar.
Baıqaýǵa qatysýshylarǵa Almaty oblysy ákiminiń orynbasary Jaqsylyq Omar sáttilik tilep, sharanyń mańyzdylyǵyna toqtaldy. Ol óz sózinde, «Birjan Sara» operasyn jazǵan talantty kompozıtor Muqan Tólebaevtyń qazaq ónerine ólsheýsiz úles qosqanyn atap ótti. Al baıqaý qorytyndysy erteń shyǵady.
