Almaty oblysynda múgedek adamdy óltirgen kúdikti áıel ustaldy
TALDYQORǴAN. QazAqparat - Almaty oblysynyń polıtseıleri 30 jastaǵy múmkindigi shekteýli er adamdy óltirdi degen kúdikpen 34 jastaǵy áıeldi ustady, dep habarlaıdy QazAqparat tilshisi.
Almaty oblystyq Polıtsııa departamentiniń málimetinshe, oqıǵa Qaratal aýdanynda bolǵan. 24 jeltoqsanda jergilikti polıtseılerge Úshtóbe qalasyndaǵy úılerdiń birinen er adamnyń máıiti tabylǵany týraly habarlama túsken. Oqıǵa ornynda tártip saqshylary qaıtys bolǵan azamattyń bir aıaǵy joq 1-toptaǵy múgedek ekenin jáne anasymen birge turǵanyn anyqtady. Dene jaraqatyn salǵan qylmys quraly bolýy múmkin asúı pyshaǵy oqıǵa ornynan tabylyp, tárkilendi.
«Qaratal aýdanynyń polıtsııasy adam ólimine qatysy bar degen kúdikpen zardap shegýshimen kórshi turatyn 34 jastaǵy áıel adamdy ustady. Aldyn-ala tergeý barysynda anyqtalǵandaı, qandy oqıǵanyń oryn alýyna ishimdik ishý kezinde týyndaǵan janjal sebep bolǵan. Qazirgi ýaqytta bul is boıynsha QR Qylmystyq kodeksiniń 99-babyna sáıkes sotqa deıingi tergeý amaldary júrgizilýde. Kúdikti aýdandyq ýaqytsha ustaý oqshaýlaǵyshyna qamaýǵa alyndy», - dep málimdedi Almaty oblysy Polıtsııa departamentiniń baspasóz qyzmeti.
Sonymen qatar, polıtsııa taratqan aqparat boıynsha qamaýǵa alynǵan azamatsha buǵan deıin tonaý isi boıynsha qylmystyq jaýapkershilikke tartylyp, bas bostandyǵynan aıyrylǵany belgili boldy.
