Almaty oblysynda mılıtsııa generalyna eskertkish ashyldy
TALDYQORǴAN. QazAqparat - Almaty oblysynyń Sarqan qalasynda mılıtsııa general-leıtenanty, Ekinshi dúnıejúzilik soǵys ardageri Ábdiqadyr Bolsambekovke eskertkish qoıyldy.
Tas músindi Almaty oblystyq ІІD ujymy Elbasynyń «Rýhanı jańǵyrý: Bolashaqqa baǵdar» maqalasy aıasynda ornatty, dep habarlaıdy QazAqparat tilshisi.
Ábdiqadyr Bolsambekov soǵysqa 1942 jyly attanyp, 1947 jyly aman oraldy. Sol ýaqyttan beri ishki ister organdarynda qatardaǵy qyzmetkerden bólim basshysyna deıin kóterildi. Máskeýdegi joǵarǵy mılıtsııa mektebin bitirip, týǵan óńiri Taldyqorǵanda uzaq jyldar qyzmet etti. General qurmetti demalysqa shyqqannan keıin de urpaq tárbıesine, qoǵamdyq jumystarǵa etene aralasty. Birneshe býyn tártip saqshylaryn tárbıeledi. 
Eskertkishtiń saltanatty ashylý rásimine oblystyq ІІD basshysy, general-maıor Murat Urymhanov qatysyp, soǵys ardageriniń esimin ardaqtaý keıingi urpaq pen jetisýlyq tártip saqshylarynyń paryzy dep atap ótti.
