Almaty oblysynda memlekettik qyzmetshilerdiń spartakıadasy bastaldy
TALDYQORǴAN. QazAqparat - Búgin Taldyqorǵan qalasyndaǵy «Jastar» cport saraıynda memlekettik qyzmetshiler kúni qarsańynda uıymdastyrylǵan X jazǵy spartakıadanyń ashylý saltanaty ótti.
Jarysqa qatysýshylardy oblys ákimi Amandyq Batalov quttyqtap, sáttilik tiledi, dep habarlaıdy QazAqparat tilshisi.
Jarystar sporttyń toǵyzqumalaq, bılıard, voleıbol, shaǵyn fýtbol, basketbol, ústel tennısi, shahmat túrleri boıynsha «Jastar» sport saraıynda, «Órken», «Dınamo», «Jastar - 2» sport keshenderinde ótedi. Spartakıada eki kúnge sozylyp, qorytyndysy erteń keshkilik belgili bolady. 
«Bul jarysty memlekettik qyzmetshilerdiń kásibı merekesine oraı jyl saıyn ótkizý dástúrge aınalǵan. Óıtkeni memlekettik basqarýdyń ózegi sanalatyn memlekettik qyzmetshiniń salaýatty ómir saltyn ustanýy qashanda mańyzdy. Memlekettik qyzmetshi barlyq jaǵynan qoǵamǵa úlgi bolýy tıis. Memlekettik qyzmetti jaýapkershilikpen atqaryp júrgen sizderge sportta da jarqyn jeńister tileımin. Memlekettik qyzmetkerler arasyndaǵy H jazǵy spartakıadany ashyq dep jarııalaımyn!», - dedi A. Batalov.
Sonymen qatar Memlekettik qyzmet isteri jáne sybaılas jemqorlyqqa qarsy is-qımyl agenttigi Almaty oblysy boıynsha departamentiniń basshysy, Ádep jónindegi keńestiń tóraǵasy Serikbaı Nurǵısaev ta jarysqa qatysýshylarǵa jeńis tiledi.
Spartakıadaǵa óńirdiń 16 aýdany men 3 qalasynyń memlekettik qyzmetshileri, oblys ákimdigi, sonymen qatar quqyq qorǵaý organdarynyń komandalary qatysýda.
Aıta ketsek, jalpy Almaty oblysynda búginde 8500-ge jýyq memlekettik qyzmetshi jumys isteıdi, olardyń 2 myńnan astamy 28 jasqa deıingi jastar, ıaǵnı olar 23% qurap otyr. Memlekettik qyzmetshilerdiń ortasha jasy - 39.
