Almaty oblysynda memqyzmetshiler artyq jumys istep, eskertý aldy

TALDYQORǴAN. QazAqparat - Almaty oblysynyń memlekettik qyzmetkerleri jumys kestesinen artyq jumys istep, eskertý aldy. Taldyqorǵanda QR Memlekettik qyzmet isteri agenttiginiń Almaty oblysy boıynsha departamenti qyzmetkerleri reıd kezinde ústeme jumys istegenderdiń ústinen tústi, dep habarlaıdy QazAqparat tilshisi.

Reıdtik sharalarǵa departament mamandarymen birge ádep keńesiniń músheleri, úkimettik emes uıym men BAQ ókilderi qatysty. Keshki 18.30-dan keıin úıine asyqpaıtyn memlekettik qyzmetkerler Taldyqorǵan qalasy ákimidiginde, oblystyq ishki aýdıt departamentinde jáne basqa da jergilikti atqarýshy organdarda kóptep kezdesti. Qala ákiminiń qos orynbasary keshki 19.00-den keıin jınalys ótkizip jatsa, keıbir mamandar tapsyrma kóp, úlgermeı jatyrmyz dep aqtalǵan. Tekserý barysynda birneshe hattama toltyrylyp, mekeme basshylaryna eskertý jasaldy. «QR Eńbek Kodeksi jáne basqa da zańnamalarǵa sáıkes memlekettik organdarda ústeme jumys istegender anyqtalsa, olarǵa aldymen eskertý beriledi. Eger quqyqbuzýshylyq qaıtalansa, ákimshilik jaza qoldanylyp mekeme basshysyna 30 AEK kóleminde aıyppul salynady. Bir jyl ishinde mundaı zań buzý deregi taǵy tirkelse, aıyppul kólemi eki eselenedi», deıdi QR Memlekettik qyzmet isteri agenttigi Almaty oblysy boıynsha departamenti memlekettik qyzmet salasyndaǵy baqylaý basqarmasynyń basshysy Ulan Qaljanov.

Sondaı-aq onyń aıtýynsha, memlekettik qyzmetshilerdi ústeme jumysqa tartýǵa bolady, alaıda ol úshin buıryq shyǵarylýy kerek. Jáne ol adam basyna táýligine eki saǵattan aspaý kerek. Al aıyna alatyn bolsaq, 12 saǵattan aspaýy tıis.

Reıdtik sharalar Almaty oblysy aýmaǵynda aldaǵy ýaqytta da óz jalǵasyn tappaq.