Almaty oblysynda mekteptiń shatyry janyp ketti
TALDYQORǴAN. QazAqparat - Almaty oblysynyń Panfılov aýdanynda mekteptiń shatyry janyp ketti, dep habarlaıdy QazAqparat tilshisi.
«2 shilde saǵat 04:15-te Almaty oblysy TJD-ǵa Panfılov aýdany Lesnovka aýylyndaǵy D. Raqysheva atyndaǵy mektep shatyrynyń janyp jatqany týraly habar tústi. Shuǵyl túrde oqıǵa ornyna Jarkent qalasynan 2 órt sóndirý esebi jiberildi, qashyqtyq - 25 shaqyrym. Birinshi bólimshe kelgennen keıin 04:40-ta mektep shatyrynyń 80% otqa oranǵany anyqtaldy. Órt ornyna qosymsha Uıǵyr aýdanynyń Shonjy aýylynan órt sóndirý qyzmeti, Panfılov aýdanynyń orman sharýashylyǵy, jedel qutqarý jasaǵy jáne jergilikti atqarýshy organdardyń qyzmetkerleri jiberildi.
Ǵımarat 2 qabatty, 1970 jyly salynǵan. 2017 jyly kúrdeli jóndeý júrgizilgen, ǵımarattyń jalpy alańy - 1442 sharshy metr. Órt 07:40-ta aýyzdyqtaldy jáne 09 saǵat 50 mınýtta tolyqtaı sóndirildi»,-dep málimdedi oblystyq TJD baspasóz qyzmetinen.
Vedomstvonyń málimetinshe, órt alańy 1200 sharshy metrdi quraǵan. Qyzyl jalynnyń sebebi anyqtalýda. Zardap shekkender joq.
Órtti sóndirýge Almaty oblysynyń TJD 31 adam 6 tehnıka, jergilikti atqarýshy organdardan 7 adam jáne 4 tehnıka (sý tasyǵysh), Jarkent orman sharýashylyǵynan 7 adam, 1 tehnıka, sondaı-aq polıtsııa bóliminen 5 adam jáne 1 tehnıka jumyldyrylǵan.
