Almaty oblysynda mektepte aqsha jınaýǵa qarsy sharalar qolǵa alyndy
TALDYQORǴAN. QazAqparat - QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Almaty oblysy boıynsha departamenti men oblystyq bilim basqarmasy ata-analarǵa broshıýralar taratyp jatyr, dep habarlaıdy QazAqparat oblys ákiminiń baspasóz qyzmetine silteme jasap.
Broshıýralarda mektepterge jáne balabaqshalarǵa memlekettik bıýdjetten bólinetin qarajattar týraly tolyq aqparat kórsetilgen. Onyń maqsaty - ata-analardyń bala oqytýda artyq qarajattyń shyǵyndalmaýyna kómektesý. Bul týraly Óńirlik kommýnıkatsııalar qyzmeti alańynda departamenttiń Sybaılas jemqorlyqtyń aldyn alý basqarmasynyń basshysy Asqar Sadyqov málim etti.
Sonymen qatar, baspasóz máslıhatynda «Adal urpaq» erikti mektep klýbtarynyń qurylýy arqyly sybaılas jemqorlyqqa qarsy jumystar júzege asyrylyp jatqany aıtyldy. Jalpy oblys aımaǵynda «Adal urpaq» klýbynyń sany 743-ke jetip, oǵan 163 058 oqýshy múshe bolyp engen.
Sondaı-aq, 2017 jyldyń sońyna deıin mektepke deıingi balalardy bilim berý uıymdaryna kezekke qoıýdyń avtomattandyrylǵan júıesin engizýdi qarjylandyrý máseleleri qarastyryldy.
«Oblystyq bilim basqarmasymen birlesip jalpy mektepishilik jınalystar aıasynda aýdan, qalalarda ata-analarǵa atalǵan aqparatty túsindirý boıynsha jumystar arnaıy kestege sáıkes bastaldy. Aqparattyq-túsindirme jumystary kelesi jyldyń aıaǵyna deıin oblys boıynsha ár mektepte ótkiziletin bolady. Al zańsyz aqsha jınaý derekteri anyqtalsa, sáıkesinshe tıisti is-sharalar qoldanylady», - dep qorytyndylady A.Sadyqov.
