Almaty oblysynda «Mektepke jol» aktsııasy kezinde 800-den astam balaǵa kómek kórsetildi

TALDYQORǴAN. QazAqparat - Almaty oblystyq bilim basqarmasynyń málimeti boıynsha Qazaqstan Respýblıkasy Táýelsizdiginiń 25 jyldyǵy sheńberinde «Baqytty balalyq shaqtyń aımaǵy» uranymen ótip jatqan «Mektepke jol» respýblıkalyq aktsııasynyń alǵashqy 10 kúninde óńirde 821 balaǵa 8 mln 489 myń teńge somaǵa demeýshilik kómek kórsetildi.

Oblys ákimdiginde arnaıy ótkizilgen baspasóz máslıhatynda aktsııanyń barlyq erekshelikteri týraly keńinen aıtyldy.

Kezdesý barysynda oblys ákiminiń orynbasary Baqtııar Ónerbaev pen oblystyq bilim basqarmasynyń basshysy Lázzat Bazarqulova qatysýshylardyń suraqtaryna jaýap berdi.

L. Bazarqulovanyń aıtýynsha, aktsııa barysynda bilim berý salasynyń organdary men tıisti áleýmettik qyzmetter árbir eldi mekende qater tobyndaǵy balalardy anyqtaý anyqtaý maqsatynda arnaıy reıdter júrgizdi. Sonyń nátıjesi boıynsha áleýmettik kómekti qajet etetin balalardyń mekenjaıy men jeke tizimi jasalýda. Osy arqyly balalardyń mektepke kelýi qamtamasyz etiletin bolady. Búgingi kúnge 1 297 reıd jasalǵan.

Jalpy, ótken jyly oblysta 51 237 balaǵa jalpy somasy 427 mln 500 myń teńgege materıaldyq kómek kórsetilgen edi. Bul kómektiń basym bóligi demeýshilik arqyly jasalǵan. Bul iste Taldyqorǵan, Qapshaǵaı qalalarynyń, Jambyl, Eńbekshiqazaq, Alakól jáne Qaratal aýdandarynyń turǵyndary asa belsendilik tanytqan.