Almaty oblysynda mektep oqýshysy 8 jasar qyzdy pedofılden qutqaryp qaldy
ASTANA. QazAqparat - Almaty oblysynda mektep oqýshysy 8 jasar qyzdy pedofılden qutqaryp qaldy, dep habarlaıdy QazAqparat.
Facebook-tiń Islam Kýraev esimdi paıdalanýshysy 14 sáýir kúni keshki altyda Qonaev atyndaǵy mekteptiń joǵary synyp oqýshysy úlken qaıǵynyń aldyn alǵany týraly jazdy.
«Ol óz ómirin qaterge tige otyryp, pedofılden kishkentaı qyzdy qutqaryp qaldy. Bul jigitti halqy bilýi tıis. Quzyrly organdar onyń erligi men batyrlyǵyn eskerýi qajet. Bul zamanda adamgershilik joǵalǵan, kóptegen eresek adamdar kómekke shaqyrǵan qyzdy kóre tura, qol ushyn sozbaǵan. Al bul jigit birden kómekke umtyldy!», - dep jazdy Islam Kýraev.
«Balany qolynan jetektegen er adamdy kórdim, kishkentaı qyz qatty jylap bara jatty. Meni kórgen boıda ol er adamnyń qolynan sytylyp shyǵyp, kópirdiń ústimen saıajaılar jaqqa qashty. Men qyzdy ózime shaqyrdym. Ol kómek surap jylady. Men: «Ne boldy?» - dep suradym. Qyz álgi er adamnyń urǵanyn aıtty. Men aıǵaılap edim, kúdikti er adam qasha jóneldi. Bir ret burylyp qarady da, qashyp ketti. Qyz jylaýyn toqtatpaı, ózin jalǵyz qaldyrmaýdy ótindi. Men onyń sómkesin alyp, úıine deıin shyǵaryp saldym», - deıdi qutqarýshy jigit Tımýr Jamalalddınov.
Sonymen birge, Islam Kýraev jas batyrdy týǵan kúnimen quttyqtaýǵa barǵanyn jazdy. Oǵan Qazaqstan halqy Assambleıasy janyndaǵy «Jarasym» respýblıkalyq jastar uıymy atynan alǵys hat pen belsendi jastar atynan qundy syılyq tapsyryldy.
