Almaty oblysynda medıtsınalyq buıymdardy shyǵaratyn jańa zaýyt ashylady
ALMATY. QazAqparat – Almaty oblysynda medıtsınalyq maqsattaǵy buıymdardy shyǵaratyn jańa zaýyt ashylady, dep habarlaıdy QazAqparat tilshisi.
Jańa óndiris 2020-2025 jyldarǵa arnalǵan farmatsevtıkalyq jáne medıtsınalyq ónerkásipti damytý jónindegi keshendi jospar sheńberinde iske qosylady. Josparǵa sáıkes, Qazaqstanda farmatsevtıkalyq sala óndirisiniń kólemin jáne dárilik zattar eksportyn 2 ese ulǵaıtý kózdelip otyr.
QR Premer-mınıstri Asqar Mamın Úkimet otyrysynda Farmatsevtıka ónerkásibi ekonomıkanyń óte mańyzdy sektory jáne halyqtyń ómiri men densaýlyǵy qaýipsizdiginiń negizi sanalatynyn aıtqan bolatyn.
Otyrys barysynda strategııalyq qujat qaraldy. Mınıstr otandyq farmatsevtıka óndirisine qatysty memlekettik qoldaý sharalaryn keńeıtýdi tapsyrdy.
Aıta keteıik, 2020 jyldyń 8 aıynyń qorytyndysy boıynsha QR farmatsevtıka ónerkásibindegi óndiris kólemi 34,1%, ıaǵnı 81,5 mlrd teńgege deıin ósken. Bul ósimge «Dolce» JShS kompanııasy úlken úles qosty, ol óndiris kólemin 58%-ǵa arttyrdy jáne atalǵan jetistikterdi toqtatpaýǵa kúsh salady.
«Innovatsııalyq tehnologııalar parki» arnaıy ekonomıkalyq aımaǵynyń sheńberinde «Dolce» JShS «Meltblaýn» úlgisindegi materıaldy (medıtsınalyq maskalarǵa arnalǵan súzgi), medıtsınalyq maskalarǵa arnalǵan rezeńke jolaqtardy, bir rettik medıtsınalyq qolǵaptardy, sterıldi shyǵys materıaldaryn (dákeden jasalǵan buıymdar ózge de medıtsınalyq qajettilikter) óndirý boıynsha zaýyt salýdy jáne óndiristik-logıstıkalyq ortalyq qurýdy josparlap otyr.
Medıtsınalyq maqsattaǵy bir rettik buıymdardy, kásibı shyǵys materıaldaryn, bir rettik kıimderdi, sondaı-aq dárilik zattardy shyǵaratyn qazaqstandyq iri óndirýshi «Dolce» JShS jańa zaýyty 100-den astam ónim túrin shyǵarady. Kásiporynnyń óndiristik qýaty – jylyna 150 mln teńge. Sonymen qatar zaýyt 300-den astam adamdy jumys ornymen qamtamasyz etedi.
«Jańa zaýyttyń ashylýy naryqty qoljetimdi baǵamen, sapaly ónimmen qamtamasyz etip qana qoımaı, áleýmettik baǵyttaǵy máselelerdi sheshýge de múmkindik beredi. 300 adamdy jumys ornymen qamtamasyz etý josparlanyp otyr. Sarapshylar jumyssyzdyqtyń pandemııadan keıingi basty problemanyń biri bolatynyn birneshe ret aıtty. Kúrdeli jaǵdaıǵa qaramastan jańa jumys oryndaryn qurý – bizdiń bul máseleni sheshýge qosqan úlesimiz», – dedi «Dolce Group» JShS dırektorlar keńesiniń tóraǵasy Elena Lı.
