Almaty oblysynda maıly daqyl óńdeıtin zaýyt ashyldy
TALDYQORǴAN. QazAqparat - Búgin Almaty oblysynyń ákimi Amandyq Batalov Alakól aýdanyna jasaǵan jumys sapary barysynda «25 jyldyqqa - 25 kásiporyn» aktsııasynyń aıasynda «Alakól - Nan» JShS-nyń maıly daqyldar óńdeıtin zaýytyn saltanatty túrde ashty, dep habarlaıdy Almaty oblysy ákiminiń baspasóz qyzmeti.
Maıly daqyldardyń barlyq túrlerin óńdeıtin zaýyttyń jalpy quny 450 mln. teńge, onyń ishinde 130 mln. teńgesi «QazAgroQarjy» AQ arqyly qarjylandyrylǵan. Jobanyń jalpy qýattylyǵy táýligine 40 tonna maıly daqyldardy óńdeıdi.
Oblys ákimi A. Batalov: «Elimizde ósiriletin soıanyń 95 paıyzy Almaty oblysynda ósedi. Óńirimizde soıa óńdeıtin tórt zaýyt bar. Bul - besinshisi. Elbasy eldi mekenderde asa aýqymdy bolmasa da osyndaı 30-50 adamdy jumys ornymen qamtıtyn shaǵyn zaýyttardy iske qosý qajettigin tapsyrǵan bolatyn. Sondyqtan mundaı kásiporyndardyń sanyn áli de kóbeıtetin bolamyz», - dedi zaýyttyń ashylý saltanatynda.
Soıa ósiretin sharýa qojalyqtarynyń aıtýynsha, buǵan deıin ósirgen ónimderin ótkizetin oryn tabý qıyndyq týdyratyn jáne ótkizgen kúnniń ózinde arzanǵa ketetin. Al jańa ashylǵan bul zaýyt dıqandardan ónimdi 1 tonnasyn 140 myń teńgeden qabyldaıdy. Bul sharýalar úshin de asa tıimdi bolyp otyr. 
Zaýyt tehnology Oljas Batyrhanovtyń aıtýynsha, aýylda maı zaýyty ashylǵany jergilikti turǵyndarǵa qolaıly bolyp otyr.
«Osy zaýytta 32 adam turaqty jumys taýyp otyrmyz. Jalaqymyz 100 myń teńge kóleminde. Kásiporyndar kóbeıgen saıyn halyqtyń da turmys jaǵdaıy jaqsara túsedi. Sondyqtan bul - biz úshin asa úlken oqıǵa», - dedi ol.
Osy saparynda oblys basshysy A. Batalov «Agrımer - Avto» jaýapkershiligi shekteýli seriktestiginiń soıa qabyldaý pýnkti jumysymen de tanysyp qaıtty.
