Almaty oblysynda mas júrgizýshi sanıtarlyq beketten ótpek boldy
TALDYQORǴAN. QazAqparat - Almaty oblysynyń tártip saqshylary buryn kólik júrgizý quqyǵynan aıyrylǵan jáne mas kúıinde kólik júrgizgen júrgizýshini anyqtady, dep habarlaıdy QazAqparat tilshisi.
Almaty oblystyq polıtsııa departamenti baspasóz qyzmetiniń málimetinshe, polıtsııa qyzmetkerleri 21 sáýir kúni saǵat 00.50 shamasynda Іle aýdany Baıserke aýylyndaǵy sanıtarlyq beketten «Toıota Land Krýzer» markaly avtokóligin tizgindegen 25 jastaǵy jergilikti turǵyndy ustaǵan.
Ol 2019 jyly 18 qańtarda avtokólikti mas kúıinde mashına aıdaǵany úshin úsh jylǵa kólik júrgizý quqyǵynan aıyrylǵan.
Atalǵan derek negizinde QR QK 346-babynyń 1-bóligine sáıkes is qozǵaldy. Avtokólik aıyp turaǵyna qoıyldy.
Aıta keteıik, jyl basynan beri quqyq qorǵaý organdary buryn kólik júrgizý quqyǵynan aıyryla tura, kólikti mas kúıinde júrgizgen 38 júrgizýshini anyqtaǵan. Atalǵan quqyq buzýshylardyń barlyǵy sotqa deıingi tergep-tekserý aıaqtalǵan soń qylmystyq jaýapkershilikke tartyldy.
