Almaty oblysynda mas júrgizýshi qaqqan eki oqýshy áli esin jımaǵan
TALDYQORǴAN. QazAqparat - Almaty oblysynda mas júrgizýshi qaqqan eki oqýshy áli es-túzsiz jatyr. Úshinshi qyzdyń aıaǵyna ota jasaldy, dep habarlaıdy QazAqparat tilshisi.
Almaty oblystyq Densaýlyq saqtaý basqarmasynyń basshysy Ómirzaq Nııazbekov balalardyń jaǵdaıyn arnaıy baryp, bilip qaıtty. Qazirgi tańda 2012 jylǵy eki oqýshy áli es-túzsiz jatyr.
«Eki naýqastyń jaǵdaıy óte aýyr. Es-túzsiz jatyr. Shelek aýdandyq aýrýhanasynda em qabyldaýda. Kúndelikti Almaty aımaqtyq balalar klınıkalyq aýrýhanasynan dárigerler kelip, balalardyń densaýlyǵyn qarap, qadaǵalap otyr», - dedi Almaty oblystyq Densaýlyq saqtaý basqarmasy baspasóz qyzmetiniń ókili Láılim Áýbákirova.
Vedomstvo ókiliniń málimetinshe, 2011 jylǵy úshinshi qyz balanyń aıaǵyna ota jasalǵan. Onyń jaǵdaıy ortasha aýyr. Dárigerler 9 jastaǵy balany Almaty aımaqtyq balalar klınıkalyq aýrýhanasyna aýystyrǵan.
Esterińizge sala keteıik, 2 naýryz kúni Eńbekshiqazaq aýdanynda mas júrgizýshi sabaqtan qaıtyp kele jatqan 4 oqýshy qyzdy kóligimen qaǵyp ketti. Onyń úsheýi aýrýhanaǵa jatqyzyldy. Balalar 8-9 jasta.
Aıta keterligi, Prezıdent Qasym-Jomart Toqaev mas júrgizýshige qatysty tergeýdi óz baqylaýyna aldy.
