Almaty oblysynda maraldardy atqan kúdikti 5 jylǵa deıin sottalýy múmkin
TALDYQORǴAN. QazAqparat - Almaty oblysynda 4 maraldy atqan kúdikti bes jylǵa deıin sottalýy múmkin. Qazir «Toyota Hilux Surf» kóligin tizgindegen júrgizýshi ustalyp, onyń kóliginiń tirkemesinen 4 maraldyń óli denesi tabyldy, dep habarlaıdy QazAqparat tilshisi.
Oqıǵa Eńbekshiqazaq aýdanyna qarasty Ekpindi aýylynyń mańynda bolǵan. Arnaıy reıd kezinde ustalǵan azamat bastapqyda qashyp qutylýǵa árekettenip, artynsha kóligimen aýdarylǵan. Anyqtalǵandaı, ol mas kúıinde bolǵan.
Qazir QR Qylmystyq kodeksiniń 337-baby 4-bóligimen ıaǵnı, zańsyz ań aýlaý boıynsha is qozǵalyp, tergeý júrip jatyr.
Al Almaty oblystyq Polıtsııa departamentiniń aqparatyna sáıkes, maraldardy zańsyz atqan kúdikti memleketke 7 mln teńgeden astam shyǵyn keltirgen. Endi ol 12 mln teńgege jýyq aıyppul tóleıdi nemese bas bostandyǵynan aıyrylýy múmkin.
«Atalǵan áreketi úshin kináli tulǵalarǵa 5 myń AEK mólsherinde aıyppul salynýy yqtımal. Nemese 5 jylǵa quqyǵyn shekteý nemese týra sol merzimge bas bostandyǵynan aıyrý jazasy qoldanylýy múmkin. Tergeý barysynda zańsyz ań aýlaǵan ózge de tulǵalardy anyqtaý sharalary qabyldanady», - dedi Almaty oblystyq Polıtsııa departamenti baspasóz qyzmetiniń ókili Serik Úpıev.
