Almaty oblysynda malshy taýyp alǵan ilbis erkindikke jiberildi
ALMATY. QazAqparat - Bıyl kóktemde Almaty oblysynda tabylǵan ilbis erkindikke jiberildi. Bul týraly Almaty zoobaǵy málim etti, dep habarlaıdy QazAqparat tilshisi.
Bıyl 20 sáýirde Almaty oblysynda mal jaıyp júrgen turǵyn álsirep qalǵan ilbis (qar barysyn) taýyp alǵan edi. Qyzyl kitapqa engen janýar veterınarlyq kómek kórsetý úshin Almaty haıýanattar baǵyna jetkizilgen bolatyn.
Zoobaqta arnaıy karantınde bolyp, mamandardyń tolyq tekserýinen, emdeýden jáne ońaltýdan ótkennen keıin jyrtqysh 15 shildede Іle Alataýy memlekettik ulttyq tabıǵı parki aýmaǵyna jiberildi.
Tabıǵatqa shyǵarar aldynda veterınarlar ony qaıtadan tekserýden ótkizip, salmaǵy men boıyn ólshegen.
«Almaty haıýanattar baǵynda bolǵan kezde barys ońaltýdan ótip, 8 keliden astam salmaq jınap, densaýlyǵy tolyq jaqsaryp, tabıǵatqa shyǵýǵa daıyn boldy. Janýar kúızeliske ushyramaýy úshin tekserý jáne tasymaldaý sharalary ony ýaqytsha uıyqtatý (narkoz qoldaný) arqyly júzege asyryldy. Zoobaqtan tabıǵatqa jiberilgenge deıin barys veterınarlardyń baqylaýynda boldy», - dep habarlady zoobaqtan.
Almaty zoobaǵynyń málimetinshe, ilbis sırek kezdesetin jyrtqysh bolǵandyqtan, ulttyq saıabaqtarda mekendeıtin barystar men basqa da janýarlardy zoologtar muqııat baqylaıdy.
«Osy maqsatta ǵalymdar janýardyń qozǵalysyn baqylap, onyń tirshiligin qadaǵalap otyrýy úshin qar barysynyń moınyna arnaıy spýtnıktik taratqyshy bar qarǵybaý taǵyp qoıdy»,- dep atap ótti zoobaq ókilderi.
