Almaty oblysynda malshy birge ishimdik ishken tanysyn óltirgen
TALDYQORǴAN. QazAqparat - Almaty oblysynda malshy ishimdikti birge ishken tanysyn óltirdi degen kúdikpen ustaldy. 66 jastaǵy turǵyn qoly qan bolyp, ıen dalada qashyp bara jatqan jerinen qolǵa tústi, dep habarlaıdy QazAqparat tilshisi.
Almaty oblystyq polıtsııa departamenti baspasóz qyzmetiniń málimetinshe, 18 mamyr kúni túngi saǵat 00:10 shamasynda Qarasaı aýdanynyń polıtseıleri arnaıy shaqyrtý boıynsha oqıǵa ornyna barǵan. Tártip saqshylary Qaskeleń qalasynyń Abylaı han kóshesinde er adamnyń denesin tapqan.
«Jedel-izdestirý sharasy arqyly polıtseıler sol mańda qashyp bara jatqan er adamdy baıqaǵan. Birden onyń izine túsip, ustaǵan. Qolǵa túsken 66 jastaǵy azamattyń ishimdik ishkeni anyqtaldy jáne onyń qoly qan boldy. Tańerteń esin jıǵannan keıin ol óziniń malshy bolyp jumys isteıtinin aıtty. Tanysymen birge ishimdik iship, sózge kelispeı, as úı pyshaǵymen ony óltirgenin de moıyndaǵan. Qylmysyn jasyrý úshin oqıǵa ornynan qashyp ketýge tyrysqan, biraq oıy júzege aspaǵan»,- delingen vedomstvonyń habarlamasynda.
Qazir aıǵaq zat tárkilendi. Kúdikti ýaqytsha ustaý ızolıatoryna qamaldy. Sotqa deıingi tergeý júrgizilip jatyr.
