Almaty oblysynda mal urlyǵymen aınalysqan 3 qylmystyq top ustaldy
ASTANA. QazAqparat - Almaty oblysynda mal urlyǵymen aınalysqan 3 qylmystyq top ustalyp, 9 mal urlyǵy áshkerelendi. Bul týraly QR Іshki ister mınıstrliginen málim etti, dep habarlaıdy QazAqparat tilshisi.
Atap aıtqanda, 5 qańtarda krımınaldyq polıtsııa qyzmetkerleri 5 adamnan turatyn qylmystyq topty ustady. Olar Kegen aýdanynyń aýmaǵynda 3 ret mal urlyǵyn jasap, 88 bas jylqyny barymtalaǵan. Sonymen qatar, sol kúni Іle aýdanynda qoı urlaýmen aınalysyp kelgen taǵy da 5 adamnan turatyn toptyń qylmysy áshkere boldy. Urylar osy ýaqytqa deıin 240 bas qoıdy qoldy qylǵan.
Al 6 qańtarda Jambyl aýdanynyń 4 turǵyny óńirde 27 jylqy urlaǵany úshin qolǵa tústi.
«Qazirgi ýaqytta urlanǵan maldardy izdeý jáne zańdy ıelerine qaıtarý jumystary júrgizilip jatyr. Búgingi kúni 12 jylqy men 51 qoı tabylyp, ıelerine qaıtaryldy. ustalǵandardyń ózge de ashylmaǵan qylmystarǵa qatysy tekserilýde», - dedi mınıstrlikten.
