Almaty oblysynda mal urlap satýdy kásip etken uıymdasqan top qolǵa tústi
TALDYQORǴAN. QazAqparat - Almaty oblysynyń polıtseıleri mal urlyǵyn kásip qylǵan urylar toby men urlanǵan maldy saýdalaýshylardy ustady, dep habarlaıdy QazAqparat tilshisi.
Qylmystyq toptyń quramynda kámelettik jasqa tolmaǵan jasóspirim de bar. 4 aýyldas jymysqy áreketterin júzege asyrý maqsatynda bas qosyp, uzaq ýaqyt boıy Eńbekshiqazaq aýdanynyń aýmaǵynda mal urlyǵymen aınalysqan.
Jergilikti turǵyndardyń malyn úptep ketip otyrǵan 19-20 jastaǵy urylardy ustaǵan tártip saqshylary qoldy bolǵan maldy satyp alýshylardy da anyqtady. Tekserý barysynda satyp alýshylardyń qorasynan urlanǵan maldyń jartysy tabyldy.
«Qylmystyq jolmen tabylǵan maldy satyp alýshylardyń qorasynan tabylǵan maldar zańdy ıelerine qaıtaryldy. Shelek polıtsııa bóliminiń qyzmetkerleri ózge de joǵalǵan maldy izdestirý jumystaryn júrgizýde. Tórt kúdiktiniń ekeýi ýaqytsha ustaý oqshaýlaǵyshyna qamaqqa alyndy. Qazirgi ýaqytta QR Qylmystyq kodeksiniń 188-babyna sáıkes sotqa deıingi tergeý amaldary júrip jatyr. Sonymen qatar, kórineý qylmystyq jolmen tabylǵan maldy satyp alýshylar da QR Qylmystyq kodeksiniń 196-babynyń talaptaryna sáıkes jaýapqa tartylatyn bolady»,- dep málimdedi Almaty oblystyq Polıtsııa departamentiniń baspasóz qyzmeti.
2018 jylǵy mamyrdan bıylǵy qańtarǵa deıingi kezeńde Eńbekshiqazaq aýdanyndaǵy 86 bas mal qoldy bolǵan 8 urlyq deregine osy qylmystyq top músheleriniń qatysy bar ekeni dáleldendi. Urlyq boıynsha zardap shekken, negizinen, Sógeti aýylynyń turǵyndarynyń materıaldyq shyǵyndary birneshe mıllıondy qurap otyr.
«Kúdiktilerdiń biri óz sózinde urlanǵan maldy satyp, onyń qarjysyn oqýynyń tólemaqysyna bergenin aıtty. Ekinshisi BMV markaly avtokóligin satyp alǵanyn moıyndady. Atalǵan kólik tárkilenip, is materıaldaryna aıǵaqzat retinde tirkeldi. Tártip saqshylary ustalǵan kúdiktilerdiń óńirdegi ózge de qylmystarǵa qatysy baryn anyqtaý boıynsha jumystar júrgizip jatyr»,- dep tolyqtyrdy baspasóz qyzmeti.
