Almaty oblysynda mal urlaǵan barymtashylar ustaldy
TALDYQORǴAN. QazAqparat - Almaty oblysynda maldy urlaǵan kúdiktiler ustaldy, dep habarlaıdy QazAqparat tilshisi.
Atalǵan derek Alakól aýdanynda tirkeldi. 15-16 jeltoqsan kúnderi aýdandaǵy «Qazaqstan» aýylynyń eki turǵynyna tıesili asyl tuqymdy toǵyz sıyr qoldy bolǵan. Aýyl turǵyndary ózderi izdep taba almaǵan soń, jaqynda ǵana polıtsııaǵa aryzdanǵan.
«Eki jigit mal urlyǵyna qatysy bar degen kúdikke ilindi. Olardyń biri buǵan deıin urlyq jasaǵany úshin qylmystyq jaýapkershilikke tartylǵan. Qazirgi ýaqytta eki kúdikti de ustalyp, qamaqqa alyndy. Urlanǵan sıyrlar Úsharal qalasynyń mańynan tabyldy. Qoldy bolǵan maldar jergilikti úsh fermerge satylǵany anyqtalyp, tárkilendi jáne sıyrlar zańdy ıelerine qaıtaryldy», - dedi Alakól aýdandyq Polıtsııa bóliminiń bastyǵy Qýat Ospanov.
Oblystyq polıtsııa taratqan aqparatqa sáıkes, joǵalǵan sıyrlardyń tek jeteýi ǵana óz ıelerine qaıtarylǵan, qalǵan ekeýi soıylyp, eti satylǵany belgili boldy. Kúdiktiler aýyl turǵyndaryna 2 mıllıon teńgeden astam shyǵyn keltirgen. Mal urlyǵy deregi boıynsha sotqa deıingi tergeý amaldary júrip jatyr. Kúdiktilerdiń budan ózge qylmystarǵa qatysy bary anyqtalýda.
«Ótken jyly oblys boıynsha mal urlyǵynyń 680 deregi ashylǵan. Sondaı-aq polıtsııa qyzmetkerleri urlanǵan 900 astam maldy taýyp, zańdy ıelerine qaıtardy», - dep tolyqtyrdy Almaty oblysy DP baspasóz qyzmeti.
