Almaty oblysynda laı kóshkini júrip, joldar jabylyp qaldy
ALMATY. QazAqparat - Almaty oblysynda sel júrip, laı kóshkini jergilikti mańyzy bar avtomobıl jolyn jaýyp tastady. Bul týraly QazAqparat QR ІІM Tótenshe jaǵdaılar komıtetiniń resmı ókili Rýslan Imanqulovqa silteme jasap habarlaıdy.
«Almaty oblysynyń Qarasaı aýdanyna qarasty Aqsaı shatqalyn tekserý barysynda Qyzyljar ózenine (Aqsaı ózeniniń salasy) úzdiksiz jaýǵan jańbyrdyń saldarynan 800 tekshe metr laı kóshkinniń júrgeni anyqtaldy. Laı kóshkini "Almaty -Aıan" balalar lagerine aparatyn jergilikti mańyzy bar avtomobıl jolyn jaýyp qalyp, asfalttyń ústimen aǵyp jatyr. Zardap shekkender men qaza tapqandar joq. Oqıǵa ornynda «Qazseldenqorǵaý» mekemesiniń jeke quramy men tehnıkasy kóshkin saldaryn joıý jumystaryn júrgizýde», - delingen taratylǵan aqparatta.
Sonymen qatar vedomstvo málimetinshe, Talǵar aýdanynda úzdik jaýyn saldarynan «Túıe» taýy bókterinen 60 tekshe metr laı kóshkini tómen syrǵyǵan.
«Sonyń saldarynan «Talǵar-Spýtnık jazǵy lageri» jergilikti mańyzy bar avtomobıl joly jartylaı jabylyp qaldy. Oqıǵa ornynda kezekshilik uıymdastyrylǵan. Jergilikti atqarýshy organdarǵa kóshkin saldaryn joıý jáne avtomobıl jolyn ýaqytsha jabý týraly tapsyrma berildi. Kóshkin saldary jańbyr tyıylǵannan keıin joıylatyn bolady», - dep atap ótti komıtetten.
