Almaty oblysynda lańkestikke qarsy operatsııalar aıaqtaldy

TALDYQORǴAN.QazAqparat – Almaty oblysynda terrorızmge qarsy operatsııalar aıaqtaldy. Biraq polıtseıler kúsheıtilgen rejımde jumys istep, qoǵamdyq tártipti qamtamasyz etýde, dep habarlaıdy QazAqparat tilshisi.

Oblys aýmaǵynda «Quqyqtyq tártip» respýblıkalyq jedel-aldyn alý sharalary júrip jatyr. Taldyqorǵan qalasynda turaqty túrde tórt blokbeket táýlik boıy jumys istep tur. Halyqtyń emin-erkin júrip turýyn qadaǵalaıtyn qosymsha baqylaý beınekameralary ornatylyp, saıajaılarda reıdtik sharalar júrgizilýde. Oblys aýmaǵynda 19 modýldik beket qoıyldy. Respýblıkalyq jáne oblystyq mańyzy bar joldar men ishki joldarda baqylaý kúsheıtildi.

«Jedel-aldyn alý sharalary barysynda 61 qylmystyq is qozǵaldy. Buryn izdeýde júrgen 11 qylmysker qolǵa tústi. 15 qarý, 3 jarylǵysh zat tárkilendi. 11 arnaıy qorǵanys quraly tabyldy. Bul baǵytta jumystar áli de jalǵasady», - dedi Almaty oblystyq Polıtsııa departamenti bastyǵynyń birinshi orynbasary Erjan Orazbaev.