Almaty oblysynda «qyzyl» mártebesi bar 148 adam karantın talaptaryn buzǵan

ALMATY OBLYSY. QazAqparat – Almaty oblysynda «Ashyq» júıesi arqyly «qyzyl» jáne «sary» mártebesi bar 314 kelýshi anyqtaldy, dep habarlaıdy QazAqparat tilshisi.

Sanıtarlyq-epıdemıologııalyq baqylaý departamentiniń habarlaýynsha, 14 sáýirden bastap Almaty oblysy aýmaǵynda «Ashyq» pılottyq jobasy iske qosyldy. Búginde oblys boıynsha 2829 nysan jumys isteıdi. «Ashyq» jobasyn engizý bastalǵaly monıtorıngtik toptar 1797 nysandy tekserip, 371 buzýshylyqty anyqtaǵan.

«QR-kodty skanerleý kezinde oblys boıynsha «qyzyl» jáne «sary» mártebesi bar 314 kelýshi anyqtaldy, onyń ishinde «qyzyl» mártebe 148 adamda, «sary» mártebe – 166 adamda bolǵan. Eńbekshiqazaq, Alakól aýdandarynan jáne Qapshaǵaı qalasynan kelgen bes kelýshige 218 775 teńgege ákimshilik quqyqbuzýshylyq týraly hattama toltyryldy», - dep habarlady departament.

Sondaı-aq Almaty oblysy boıynsha jergilikti atqarýshy organdar janynan qurylǵan 268 monıtorıngtik top jumys isteıdi. Jyl basynan beri olar 25 myńnan astam reıd júrgizdi, 138 myń nysandy tekserip, 1188 karantın rejımin buzý faktisin tirkedi.

675 nysanǵa 79 mıllıonnan astam teńgege aıyppul salyndy, onyń ishinde 182 buzýshylyq jappaı otbasylyq jáne ujymdyq is-sharalar (toı, uzatý, qudalyq jáne týǵan kúnder) ótkizý boıynsha qoǵamdyq tamaqtaný oryndarda jasalǵan. Karantın jáne maska rejımin saqtamaǵany úshin jeke tulǵalarǵa 511 hattama toltyryldy.