Almaty oblysynda qylmystyq top oqýshylardy tonap kelgen
TALDYQORǴAN. QazAqparat - Almaty oblysynda oqýshylardy tonady degen kúdikpen úsh adam ustaldy. Onyń bireýi kámelettik jasqa tolmaǵan jasóspirim, dep habarlaıdy QazAqparat tilshisi.
Almaty oblystyq Polıtsııa departamentiniń baspasóz qyzmetinen málim etkendeı, úsh jigit sońǵy eki aıdan beri oqýshylardyń qymbat uıaly telefondaryn, aqshalaryn tartyp alyp otyrǵan. Oqıǵa Jambyl aýdanyndaǵy Uzynaǵash aýylynda bolǵan.
«Ustalǵandar ázirge eki tonaý jáne bir qaraqshylyq faktisin jasady dep tergelýde. Olardyń ózge de qylmystarǵa qatysy bar-joǵy tekserilip jatyr. Kúdiktilerdiń ekeýi kámelettik jasqa tolǵandyqtan, olar ýaqytsha ustaý ızolıatoryna jetkizildi», - delingen atalǵan vedomstvonyń taratqan aqparatynda.
Atalmysh faktige oraı QR QK-niń 191 («Tonaý») jáne 192-inshi («Qaraqshylyq») baptaryna sáıkes sotqa deıingi tergeý júrýde.
